बालकाण्ड · भाग ७

गीतावली पद 91 से 100 तक/पृष्ठ 7

097.

लेहु री! लोचननिको लाहु |

कुँवर सुन्दर साँवरो, सखि सुमुखि ! सादर चाहु ||

खण्डि हर-कोदण्ड ठाढ़े, जानु-लम्बित-बाहु |

रुचिर उर जयमाल राजति, देत सुख सब काहु ||

चितै चित-हित-सहित नख-सिख अंग-अंग निबाहु |

सुकृत निज, सियराम-रुप, बिरञ्चि-मतिहि सराहु ||

मुदित मन बरबदन-सोभा उदित अधिक उछाहु |

मनहु दूरि कलङ्क करि ससि समर सूद्यो राहु ||

नयन सुखमा-अयन हरत सरोज-सुन्दरताहु |

बसत तुलसीदास-उरपुर जानकीकौ नाहु ||

गीतावली पद 91 से 100 तक/पृष्ठ 8

098.

भूपके भागकी अधिकाई |

टूट्यो धनुष, मनोरथ पूज्यौ, बिधि सब बात बनाई ||

तबतें दिन-दिन उदय जनकको जबतें जानकी जाई |

अब यहि ब्याह सफल भयो जीवन, त्रिभुवन बिदित बड़ाई ||

बारहि बार पहुनई ऐहैं राम लषन दोउ भाई |

एहि आनन्द मगन पुरबासिन्ह देहदसा बिसराई ||

सादर सकल बिलोकत रामहि, काम-कोटि छबि छाई |

यह सुख समौ समाज एक मुख क्यों तुलसी कहै गाई ||

गीतावली पद 91 से 100 तक/पृष्ठ 9

99

विवाहकी तैयारी

मेरे बावक कैसे धौं मग निबहहिंगे?

भूख, पियास ,सीत, श्रम सकुचनि क्यों कौसिकहि कहहिंगे।1।

को भोर ही उबटि अन्हवैहै, काढ़ि कलेऊ दैहैं?

को भूषन पहिराइ निछावरि करि लोचन-सुख लैहै?।2।

नयन निरेषनि ज्यों जोगवैं नित पितु -परिजन-महतारी।

ते पठए ऋषि साथ निसाचर मारन, मख रखवारी।3।

सुंदर सुठि सुकुमार सुकोमल काकपच्छ-धर दोऊ।

तुलसी निरखि हरषि उर लैहौैं बिधि ह्वैहै दिन सोऊ?।4।

गीतावली पद 91 से 100 तक/पृष्ठ 10

(100)

ऋषि नृप-सीस ठगौरी-सी डारी।

कुलगुर, सचिव, निपुन नेवनि अवरेब न समुझि सुधारी।1।

सिरिस-सुमन-सुकुमार कुँवर दोउ, सूर सरोष सुरारी।

पठए बिनहि सहाय पयादेहि केलि-बान-धनुधारी।2।

अति सनेह-कातरि माता कहै, सुनि सखि! बचन दुखारी।

बादि बीर -जननी-जीवन जग, छत्रि -जाति- गति भारी।3।

जो कहिहै फिरे राम-लखन घर करि मुनिमख-रखवारी।

सो तुलसी प्रिय मोहिं लागिहै ज्यों सुभाय सुत चारी।4।

गीतावली पद 101 से 110 तक/पृष्ठ 1

(101)

जबतें लै मुनि सङ्ग सिधाए |

राम लखनके समाचार, सखि तबतें कछुअ न पाए ||

बिनु पानही गमन, फल भोजन, भूमि सयन तरुछाहीं |

सर-सरिता जलपान, सिसुनके सँग सुसेवक नाहीं ||

कौसिक परम कृपालु परमहित, समरथ, सुखद, सुचाली |

बालक सुठि सुकुमार सकोची, समुझि सोच मोहि आली ||

बचन सप्रेम सुमित्राके सुनि सब सनेह-बस रानी |

तुलसी आइ भरत तेहि औसर कही सुमङ्गल बानी ||

गीतावली पद 101 से 110 तक/पृष्ठ 2

102

सानुज भरत भवन उठि धाए |

पितु-समीप सब समाचार सुनि, मुदित मातु पहँ आए ||

सजल नयन, तनु पुलक, अधर फरकत लखि प्रीति सुहाई |

कौसल्या लिये लाइ हृदय, बलि कहौ, कछु है सुधि पाई ||

सतानन्द उपरोहित अपने तिरहुति-नाथ पठाए |

खेम कुसल रघुबीर-लषनकी ललित पत्रिका ल्याए ||

दलि ताडुका, मारि निसिचर, मख राखि, बिप्र-तिय तारी |

दै बिद्या लै गये जनकपुर, हैं गुरु-सङ्ग सुखारी ||

करि पिनाक-पन, सुता-स्वयम्बर सजि, नृप-कटक बटोर्यो |

राजसभा रघुबर मृनाल ज्यों सम्भु-सरासन तोर्यो ||

यों कहि सिथिल-सनेह बन्धु दोउ, अंब अंक भरि लीन्हें |

बार-बार मुख चूमि, चारु मनि-बसन निछावरि कीन्हें ||

सुनत सुहावनि चाह अवध घर घर आनन्द बधाई |

तुलसिदास रनिवास रहस-बस, सखी सुमङ्गल गाई ||

गीतावली पद 101 से 110 तक/पृष्ठ 3

103

राम-लषन सुधि आई बाजै अवध बधाई |

ललित लगन लिखि पत्रिका,

उपरोहितके कर जनक-जनेस पठाई ||

कन्या भूप बिदेहकी रुपकी अधिकाई,

तासु स्वयम्बर सुनि सब आए

देस देसके नृप चतुरङ्ग बनाई ||

पन पिनाक, पबि मेरु तें गुरुता कठिनाई |

लोकपाल, महिपाल, बान बानैत,

दसानन सके न चाप चढ़ाई ||

तेहि समाज रघुराजके मृगराज जगाई |

भञ्जि सरासन सम्भुको जग जय,

कल कीरति, तिय तियमनि सिय पाई ||

पुर घर घर आनन्द महा सुनि चाह सुहाई |

मातु मुदित मङ्गल सजैं,

कहैं मुनि प्रसाद भये सकल सुमङ्गल, माई ||

गुरु-आयसु मण्डप रच्यो, सब साज सजाई |

तुलसिदास दसरथ बरात सजि,

पूजि गनेसहि चले निसान बजाई ||

गीतावली पद 101 से 110 तक/पृष्ठ 4

104

मनमें मञ्जु मनोरथ हो, री !

सो हर-गौरि-प्रसाद एकतें, कौसिक, कृपा चौगुनो भो, री !||

पन-परिताप, चाप-चिन्ता निसि, सोच-सकोच-तिमिर नहिं थोरी |

रबिकुल-रबि अवलोकि सभा-सर हितचित-बारिज-बन बिकसोरी ||

कुँवर-कुँवरि सब मङ्गल मूरति, नृप दोउ धरमधुरधर धोरी |

राजसमाज भूरि-भागी, जिन लोचन लाहु लह्यो एक ठौरी ||

ब्याह-उछाह राम-सीताको सुकृत सकेलि बिरञ्चि रच्यो, री |

तुलसिदास जानै सोइ यह सुख जेहि उर बसति मनोहर जोरी ||

गीतावली पद 101 से 110 तक/पृष्ठ 5

105

राजति राम-जानकी-जोरी |

स्याम-सरोज जलद सुन्दर बर, दुलहिनि तड़ित-बरन तनु गोरी ||

ब्याह समय सोहति बितानतर, उपमा कहुँ न लहति मति मोरी |

मनहुँ मदन मञ्जुल मण्डपमहँ छबि-सिँगार-सोभा इक ठौरी

मङ्गलमय दोउ, अंग मनोहर, ग्रथित चूनरी पीत पिछोरी |

कनककलस कहँदेत भाँवरी, निरखि रुप सारद भै भोरी ||

इत बसिष्ठ मुनि, उतहि सतानँद, बंस बखान करैं दोउ ओरी |

इत अवधेस, उतहि मिथिलापति, भरत अंक सुखसिन्धु हिलोरी ||

मुदित जनक, रनिवास रहसबस, चतुर नारि चितवहिं तृन तोरी |

गान-निसान-बेद-धुनि सुनि सुर बरसत सुमन, हरष कहै कोरी?||

नयननको फल पाइ प्रेमबस सकल असीसत ईस निहोरी |

तुलसी जेहि आनन्दमगन मन, क्यों रसना बरनै सुख सो री ||

गीतावली पद 101 से 110 तक/पृष्ठ 6

106

दूलह राम, सीय दुलही री

घन-दामिनि बर बरन, हरन-मन सुन्दरता नखसिख निबही, री ||

ब्याह-बिभूषन-बसन-बिभूषित, सखि अवली लखि ठगि सी रही, री|

जीवन-जनम-लाहु, लोचन-फल है इतनोइ, लह्यो आजु सही, री ||

सुखमा सुरभि सिँगार-छीर दुहि मयन अमियमय कियो है दही, री|

मथि माखन सिय-राम सँवारे, सकल भुवन छबि मनहु मही, री ||

तुलसिदास जोरी देखत सुख सोभा अतुल, न जाति कही, री |

रुप-रासि बिरची बिरञ्चि मनो, सिला लवनि रति-काम लही, री ||

गीतावली पद 101 से 110 तक/पृष्ठ 7

107

जैसे ललित लषन लाल लोने |

तैसिये ललित उरमिला, परसपर लषत सुलोचन कोने ||

सुखमासार सिगाँरसार करि कनक रचे हैं तिहि सोने |

रुपप्रेम-परमिति न परत कहि, बिथकि रही मति मौने ||

सोभा सील-सनेह सोहावनो, समौ केलिगृह गौने |

देखि तियनिके नयन सफल भये, तुलसीदासहूके होने ||

गीतावली पद 101 से 110 तक/पृष्ठ 8

108

जानकी-बर सुन्दर, माई |

इन्द्रनील-मनि-स्याम सुभग, अँग-अंग मनोजनि बहु छबि छाई ||

अरुन चरन, अंगुली मनोहर, नख दुतिवन्त, कछुक अरुनाई |

कञ्जदलनिपर मनहु भौम दस बैठे अचल सुसदसि बनाई ||

पीन जानु, उर चारु, जटित मनि नूपुर पद कल मुखर सोहाई |

पीत पराग भरे अलिगन जनु जुगल जलज लखि रहे लोभाई ||

किङ्किनि कनक कञ्ज अवली मृदु मरकत सिखर मध्य जनु जाई|

गई न उपर, सभीत नमित मुख, बिकसि चहूँ दिसि रही लोनाई ||

नाभि गँभीर, उदर रेखा बर, उर भृगु-चरन-चिन्ह सुखदाई |

भुज प्रलम्ब भूषन अनेक जुत, बसन पीत सोभा अधिकाई ||

जग्योपबीत बिचित्र हेममय, मुक्तामाल उरसि मोहि भाई |

कन्द-तड़ित बिच जनु सुरपति धनु रुचिर बलाक पाँति चलि आई||

कम्बु कण्ठ चिबुकाधर सुन्दर, क्यों कहौं दसनन की रुचिराई |

पदुमकोस महँ बसे बज्र मनो निज सँग तड़ित-अरुन-रुचि लाई ||

नासिक चारु, ललित लोचन, भ्रकुटिल, कचनि अनुपम छबि पाई |

रहे घेरि राजीव उभय मनो चञ्चरीक कछु हृदय डेराई ||

भाल तिलक, कञ्चन किरीट सिर, कुण्डल लोल कपोलनि झाँई |

निरखहिं नारि-निकर बिदेहपुर निमि नृपकी मरजाद मिटाई ||

सारद-सेस-सम्भु निसि-बासर चिन्तत रुप, न हृदय समाई |

तुलसिदास सठ क्यों करि बरनै यह छबि निगम नेति कह गाई ||

गीतावली पद 101 से 110 तक/पृष्ठ 9

109

अयोध्या-आगमन

भुजनिपर जननी वारि-फेरि डारी |

क्यों तोर्यो कोमल कर-कमलनि सम्भु-सरासन भारी? ||

क्यों मारीच सुबाहु महाबल प्रबल ताडका मारी ?

मुनि-प्रसाद मेरे राम-लषनकी बिधि बड़ि करवर टारी ||

चरनरेनु लै नयननि लावति, क्यों मुनिबधू उधारी |

कहौधौं तात! क्यों जीति सकल नृप बरी है बिदेहकुमारी ||

दुसह-रोष-मूरति भृगुपति अति नृपति-निकर खयकारी |

क्यों सौम्प्यो सारङ्ग हारि हिय, करी है बहुत मनुहारी ||

उमगि-उमगि आनन्द बिलोकति बधुन सहित सुत चारी |

तुलसिदास आरती उतारति प्रेम-मगन महतारी ||

गीतावली पद 101 से 110 तक/पृष्ठ 10

110

मुदित-मन आरती करैं माता |

कनक-बसन-मनि वारि-वारि करि पुलक प्रफुल्लित गाता ||

पालागनि दुलहियन सिखावति सरिस सासु सत-साता |

देहिं असीस ते बरिस कोटि लगि अचल होउ अहिबाता ||

राम सीय-छबि देखि जुबतिजन करहिं परसपर बाता |

अब जान्यो साँचहू सुनहु, सखि! कोबिद बड़ो बिधाता ||

मङ्गल-गान निसान नगर-नभ आनँद कह्यो न जाता |

चिरजीवहु अवधेस-सुवन सब तुलसिदास-सुखदाता ||