पद २५८

जानि पहिचानि मैं बिसारे हौं कृपानिधान!

एतो मान ढीठ हौं उलटि देत खौरि हौं।

करत जतन जासों जोरिबे को जोगीजन,

तासों क्योंहू जुरी, सो अभागो बैठो तोरि हौं ॥ १ ॥

मोसो दोस-कोसको भुवन-कोस दूसरो न,

आपनी समुझि सूझि आयो टकटोरि हौं।

गाड़ीके स्वानकी नाईं,माया मोहकी बड़ाई,

छिनहिं तजत, छिन भजत बहोरि हौं ॥ २ ॥

बड़ो साईं-द्रोही न बराबरी मेरीको कोऊ,

नाथकी सपथ किये कहत करोरि हौं।

दूरि कीजै द्वारतें लबार लालची प्रपंची,

सुधा-सो सलिल सूकरी ज्यों गहडोरिहौं ॥ ३ ॥

राखिये नीके सुधारि, नीचको डारिये मारि,

दुहूँ ओरकी बिचारि, अब न निहोरिहौं।

तुलसी कही है साँची रेख बार बार खाँची,

ढील किये नाम-महिमाकी नाव बोरिहौं ॥ ४ ॥