पद 94

काहे ते हरि मोहिं बिसारो।

जानत निज महिमा मेरे अघ,तदपि न नाथ सँभारो ॥ 1 ॥

पतित-पुनीत,दीनहित,असरन-सरन कहत श्रुति चारो।

हौं नहिं अधम,सभीत,दीन ? किधौं बेदन मृषा पुकारो ? ॥ 2 ॥

खग-गनिका-गज-ब्याध-पाँति जहँ तहँ हौहूँ बैठारो।

अब केहि लाज कृपानिधान ! परसत पनवारो फारो ॥ 3 ॥

जो कलिकाल प्रबल अति होतो, तुव निदेसतें न्यारो।

तौ हरि रोष भरोस दोष गुन तेहि भजते तजि गारो ॥ 4 ॥

मसक बिरंचि,बिरंचि मसक सम, करहु प्रभाउ तुम्हारो।

यह सामरथ अछत मोहिं त्यागहु, नाथ तहाँ कछु चारो ॥ 5 ॥

नाहिन नरक परत मोकहँ डर,जद्यपि हौं अति हारो।

यह बडि त्रास दासतुलसी प्रभु,नामहु पाप न जारो ॥ 6 ॥